Егерде сиз перзентиңизди жақсы етип тәрбияламақшы болсаңыз, онда оған еки есе аз пул ҳәм еки есе көп ўақыт ажыратың.
*** *** ***
Кисең қаңырап турғаны қәўипли емес… Жүректиң қаңыраўы – әне, усы қәўипли.
*** *** ***
Әўметли болыўға емес, ал өмириңниң мәнисли болыўына умтыл.
*** *** ***
Ҳаял ямаса қыздың келбети мәстан кемпирдикинен де әбеший болыўы мүмкин, бирақ егерде жүреги муҳаббатқа толы болса – ол жигитлердиң итибарына итияж сезбейди.
*** *** ***
Адамның қандай екенлигин оның ис-ҳәрекетине қарап билесең. Гәплерге исенбе. Бақла ҳәм ҳақыйқатлықты түсин.
*** *** ***
Уллы жақсылықлардың бири – жақын инсанларыңның ойсызлықларын көтериўиң.

Дәслеп Өзиңди жақсы кӨр!

Жигитлер сулыў, ақыллы, сүйкимли, бахытлы қызларды жақсы көреди. Олар усындай қызлар менен мүнәсибет орнатқанды қәлейди. Ал, бәрқулла налынып жүретуғын, бахытсыз, жылаўық қызлар ҳеш кимге де қызық емес. Ер адамлар бахытсыз ҳаялды бахытлы ете алмайды. Олар бул дәрежеде күшли емес. Ҳаял адамның өзи бахытлы болыўға умтылыўы керек. Егер сиз өзиңизге бир жигиттиң итибар қаратыўын қәлесеңиз, ол ушын сүйкимли болың. Буның ушын сизде барлық имканиятлар бар: сиз гөззалсыз, жасыңыз да 97 де емес, он еки мүшеңиз пүтин, ес-ақылыңыз да орнында… Ҳеш қандай машқала жоқ.

Өкпелегишпен
– Ассалаўма әлейкүм Кемпир апа! Кеңеслериңиз ушын шаңарағымыз бенен сизге миннетдармыз. Көп мәселелерди түсинип атырмыз. Енди өзим де бир мәселе бойынша сораў бермекши едим. Жасым 40 тан өтти. Шаңарақлы болғаныма 20 жылға шамаласты. Усы жыллар даўамында мен қанша мәрте күйеўиме ҳәм басқаларға қапа болдым, өкпеледим.  Мен усы иллетимнен қутылыўды ойлап жүрмен. Оның мениң өзиме қатты зыянын тийгизетуғынын билемен. Бирақ, өкпелемей тура алмайман. Алдын бир данышпанның мына гәплерин оқыған едим: «Биреўге өкпелесек, биз оны өзимиздиң қәддимизге яки оннан да төмен түсиремиз». Бул гәпти түсиниў маған әҳмийетли. Усыны түсиндирип берсеңиз. Алдыннан рахмет.
Ҳүрмет пенен, Шәрийпа.
– Ўәлейкум ассалам, Шәрийпа қызым. Өкпелегиш яки ашыўланғыш адамның өзи кейин қатты азап шегеди. Сонлықтан, оның алдын алған мақул. Биз биреўге өкпелесек – өзимиз оны әдетте, оғыры «жаман» адамға шығарамыз. Оның жаман адам екенлигин өзимиз өзимизге дәлийллемекши боламыз ҳәм буның ушын оны қыялымызда «усы ҳалға саламыз». Ақыбетинде, оны өзимиздиң унамсыз сезим-туйғыларымыздың қурбанына айландырамыз. «Биреўге өкпелесек, биз оны өзимиздиң қәддимизге яки оннан да төмен түсиремиз» дегенде усы ҳал түсиндирилмекши болған еди. 

Адамның жасы улғайғаны, денеси қартайғаны менен, кеўли баладай болады. Себеби, кеўил (руўх) ҳешқашан улғаймайды – оған ўақыт тәсир етпейди.
*** *** ***
Егерде бизлер басқаларға кесиримизди тийгизбесек, ҳәммеге ҳүрмет пенен қарасақ – онда ҳешким бизлердиң де тынышымызды ала алмайды.
*** *** ***
Өтмиште жиберген қәтелериңиз ушын өзиңизди қатты кейимең. Сол пайытлары сиз бахытлы болыўға урынған едиңиз ғана.
*** *** ***
Ең жоқарыда даналықлар турады. Бирақ, усы даналықлардан да жоқарғысы – оларға әмел етиў.
*** *** ***
Ҳаял-қыздың шырайы оны көкирек етеди, ал көкиреклик – қатнасықларды бузады.
*** *** ***
Адам өзиниң аўыр мүсийбетинде өзин емес, ал тәғдирди, жасап турған орталығын, ата-анасын ҳәм басқаларды айыплаўға бейим.
*** *** ***
Мектеп оқыўшыларға тек ядлап қалыўды емес, ал пикирлеўди үйретиўи тийис.
*** *** ***
Ышқ оты лаўлап жанғанында – муҳаббат емес, ал апатшылық келеди.

Данышпанлық белгиси
Күнлердиң биринде шәкиртлери уллы данышпаннан сорапты: «О, Устаз, адамлар Жалғасты жаманлайды, ал Мақсетти  мақтайды – олардың айтқанлары дурыс па я қәте ме, буны қалай билемиз? »
«Буннан да аңсат ис барма екен?!» депти Устаз. Ол Жалғасты алдына шақыртты да, оған тапсырма берди: «Жалғас, халық арасына бар да, ишинен таўып, мениң алдыма меҳрийбан адамды алып кел!»   
Жалғас қала ҳәм аўылларды гезип, көп адамлар менен сөйлесип, шаңға былғанып, шаршап, ақыры қайтып келипти. «Устаз, – депти ол, – мен сизиң тапсырмаңызды орынлай алмадым. Маған тек көптен-көп жаўыз ҳәм жаман адамлар дусласа берди. Қанша излестирсем де, оңлысын таба алмадым!»
Сонда Устаз алдына Мақсетти шақыртыпты. «Саған буйыраман, – депти ол, – қала ҳәм аўылларды гез де, усы жерге жаўыз адамды таўып алып кел!»