«Саза» журналы

Жаңа жыл медитациясы

Журналымыздың ҳүрметли ықласбентлери! 

Жаңа жыл медитациясына қатнасасыз деп үмит етемиз. Өйткени бул ҳәммемизге керек. Жақынларыңыз ҳәм досларыңызға усыныс етиң.

 

Уллы Бердақ бабамыз «Жигит болсаң арысландай туўылған,

                                  Хызмет еткил удайына халық ушын» деп тапсырғанындай, көпшилигимиз халық мәпин ойлап хызмет етиўди унатамыз. Мине, пурсат келди!

 

Халқымыздың бахытлы, абат турмыс қурыўын қәлейсиз бе? Ҳәммеңизди 2017-жыл 29-декабрь күнинен баслап 2018-жыл 3-январь күнине шекем (6 күн) Жаңа жыл медитациясына қатнасыўға, улыўмалық қыял етиўге – мирәт етемиз. Усы күнлери азанда саат 05:30 турың, жуўынып-шайының. Салқын суўда жуўынсаңыз оғада жақсы. Саат 05:55 ке шекем таза кийимлерди кийип, ҳешким кесент етпейтуғын ханаға кириң. Малдас қурынып ямаса лотос позасында  отырың.  Саат 06:00 ға дейин тыныш отырың, ақылыңызда ҳешнәрсе болмасын. Қәйтип дем алып атырсыз, қалай шығарып атырсыз – соларға итибар бериң. Көз алдыңызға ҳешнәрсени келтирмең – тек қараңғылық болсын. Усы отырыста 100 ден 0 ге шекем ишиңизден айтып санаң (100, 99, 98…). Ақылыңыз толық тынышланғаннан кейин, Космостың түпкиринен Қуяштың нурындай ақшыл-сары-қызғыш нурды келтириң ҳәм оны шүй төбеңизден киргизиң. Ҳәр нәпес алған сайын, нурлар сизге толқынланып кирсин. Бул нурлар басыңыз ҳәм мойныңыздан өтип, өкпеңизге кирсин, кейин жүрегиңиздиң қан тамырлары арқалы барлық мүшелериңизге тарқалсын. Усыларды қыял етиң. Кейинги 15-20 минут даўамында жылдан-жылға көркем болып баратырған Ана-Ўатанымызды көз алдыңызға келтирип,  оның ҳәр бир қала ҳәм районларын, атыз ҳәм далаларын, ҳәр бир көше ҳәм жайларын, мәкеме ҳәм адамларын, дарақларды, Әмиўдәрья, көллер ҳәм каналларды көз алдыңызға қуўанып келтириң. Олардың ҳәммесин жүрегиңизден атлығып шығып атырған муҳаббатыңыз бенен шомылдырың! Кейин пүткил Ана-Жеримизди муҳаббатқа бөлендириң! Шын жүректен, шын кеўилден… Жүрегиңизде пайда болған йошты «Мен ҳәммеге бахыт тилеймен! Мен ҳәммеге бахыт тилеймен! Мен ҳәммеге бахыт тилеймен!» деп сыртқа шығарың.

Сиз бенен жасап ҳәм жумыс ислеп атырған, ағайин-туўысқан, қоңсы-қоба, таныйтуғын ҳәм танымайтуғын барлық инсанларды – улыўма ҳәммени көз алдыңызға келтирип айтың:

«Мен ҳәммеңизге бахыт тилеймен!

  Мен ҳәммеңизге бахыт тилеймен!

    Мен ҳәммеңизге бахыт тилеймен!»

 

Өзиңиз билетуғын инсанларды улыўмалық қыял етиўге шақырың, олар да усылайынша Ана-Ўатанымыздың гүллеп жаснаўына өз үлеслерин қоссын! Бир нәрсени умытпаң – усы 6 күн даўамында саат азанғы 06:00 ден 06:20 ға шекем нийетимиз ҳәм қыялымыз бенен ҳәммемиз бирге боламыз!

(CАЗА журналы №12 (93) Декабрь 2017)